卡塔爾特集：半日打盡多哈五大景點

卡塔爾世界盃日記 倒數3日

港佬港婦喺清邁生活咗個多月就暫時離開，去到卡塔爾首都多哈睇世界盃，做我認為人生總要做一次嘅事。為緊貼盛事，呢個Blog又不按順序咁加插一系列世界盃直擊特集。

呢日飛到嚟多哈，晨早到埗，入境時已遇到阻滯：過關時要影相掃瞳孔，但係我天生眼細，竟然掃極都掃唔到。起初都覺得小意思，個女關員亦好nice咁叫我瞪大啲雙眼再試，大家都覺得好笑。但係咁樣居然搞咗十幾分鐘，我前後掃咗不下20次，而個關員見唔work，叫埋隔籬個關員研究一大餐，當部機有問題嘅時候，佢哋係冇應對方案，錯嘅唔通係我雙眼？雖然佢哋都有表示無奈，但就一定要我試到得為止，我心諗如果真係唔得，莫非你要遣返我？去到呢個位，我真係有啲忟。好彩俾佢玩咗一大輪之後，最終都掃到。多謝我隻眼。

步出禁區梗係想出SIM卡，原來有counter免費派，5G速度，2022MB，三日有效。無非想你三日後增值繼續用。

之後搭的士去到AirBnB間舊屋，入去間有浸除嘅房（租咗間房咋，二千幾港紙一晚呀大佬，屋主喺隔籬房瞓）放低行李，再坐車去市中心閒逛，唔覺意居然半日就去咗多哈五大景點。

最先去到卡塔爾國家博物館（National Museum of Qatar），法國建築大師Jean Nouvel操刀設計，外形係幾特別嘅，不過我哋都係打張卡就走人，冇入去參觀。

跟住行到去濱海大道（Doha Corniche），由頭到尾要行粒幾鐘，我哋行咗45分鐘，沿途處處充滿世界盃元素。

途中步過第三個景點：伊斯蘭藝術博物館（Museum of Islamic Art）。

走馬看花去到第四個景點：螺旋清真寺（Spiral Mosque）。

世界盃未開鑼，嘉年華已開始，有音樂表演，又有雜耍，場面熱鬧。

世界盃倒數鐘，多哈夜景襯托，個個排隊打卡。

行到攰搵嘢食，嚟到第五個景點：瓦其夫市場（Souq Waqif）。呢個市場採用咗卡塔爾傳統建築風格，中東味十足。

走進一間地道食店，一般遊客都會喺有枱有凳嘅位置用膳，但係因為太多人，搵個位都難，我哋貢咗入去當地人席地而食嘅範圍，佢哋見有遊客坐咗喺隔籬，都非常好奇，好友善咁同我哋傾偈，仲請我哋食中東薄餅。佢哋教路，坐呢啲位要用咕𠱸劃出你嘅「地頭」，咁就大家楚河漢界嘞。呢碟羊肉飯，兩個人都食唔晒。

影片：

2022.11.17